Pas informacioneve të siguruara më parë nga Agjencia e Sigurisë Kombëtare në koordinim me Prokurorinë Publike dhe Ministrinë e Brendshme - Byroja e Sigurisë Publike, më 15 dhjetor 2024, u krye një operacion në zonën e qyteteve të Gostivarit dhe Strugës, në të cilin u arrestuan dhe u privuan nga liria katër persona, nën dyshimin për përfshirje në aktivitete të lidhura me terrorizmin.



Për të parandaluar kryerjen e aktiviteteve terroriste, Agjencia e Sigurisë Kombëtare, në bashkëpunim dhe nëpërmjet shkëmbimit të informacionit me shërbimet partnere, kohët e fundit ka ndërmarrë masa dhe aktivitete të përforcuara operative kundër këtyre individëve.



Individët janë të lidhur ideologjikisht me organizatën terroriste "Shteti Islamik/ISIS" dhe në periudhën e kaluar kanë ndërmarrë aktivitete për indoktrinimin fetar-radikal të të rinjve, si dhe veprime përgatitore që lidhen me kryerjen e aktiviteteve të dhunshme që përmbajnë elementë të terrorizmit.



Gjatë procedurës së mëtejshme, autoritetet gjyqësore kompetente, në koordinim me Ministrinë e Brendshme, ndërmarrin masa dhe aktivitete për të kryer veprime hetimore shtesë në lidhje me personat në fjalë.



Agjencia e Sigurisë Kombëtare, brenda kompetencave dhe mandateve të saj për parandalimin e hershëm dhe mbrojtjen e sigurisë së shtetit dhe qytetarëve, mbetet e përkushtuar dhe ndërmerr vazhdimisht një sërë masash dhe aktivitetesh, duke përfshirë zbulimin e propagandës dhe përmbajtjes online që lidhet me organizatat terroriste ndërkombëtare dhe synon të rekrutojë, frymëzojë ose nxisë terrorizëm.



Kërcënimet moderne të sigurisë theksojnë rëndësinë e bashkëpunimit me institucionet partnere vendase dhe të huaja, dhe Agjencia mbetet një partner i përkushtuar dhe i besueshëm në parandalimin dhe pengimin e kërcënimeve ndaj sigurisë kombëtare.