На 12 март 2025 година во седиштето на Агенцијата за национална безбедност беше потпишан Меморандум за соработка помеѓу Агенцијата за национална безбедност и Агенцијата за вработување. Меморандумот беше потпишан од страна на директорот на Агенцијата за национална безбедност Бојан Христовски, и в.д. директорот на Агенцијата за вработување, Сељатин Бељули.


Со потпишувањето на овој Меморандум, двете институции официјално изразија своја подготвеност за воспоставување непосредна и конструктивна соработка, која ќе биде заснована на принципите на доверба, разбирање и заедничка посветеност на заштита на интересите на државата. Целта на оваа соработка е да се обезбеди ефикасно спроведување на законски утврдените надлежности на двете институции, со акцент на откривање, спречување и намалување на безбедносни закани и ризици кои можат да ја загрозат националната безбедност на државата.


Меморандумот поставува основа за долгорочна соработка, со цел меѓусебно разменување на податоци кои се неопходни за извршување на надлежностите на двете агенции. Размената на податоци ќе биде строго регулирана и ќе се врши само во рамките на законски дозволеното, за да се обезбеди заштита на чувствителните информации и приватноста на граѓаните.


Клучен аспект на соработката е размената на податоци кои ги водат двете агенции, како и деталите околу начинот на размена на овие податоци, кои се потребни за спроведување на законските надлежности на двете институции. Со овој меморандум, ќе се обезбеди координиран пристап во откривање на потенцијални безбедносни ризици и ќе се создаде цврста основа за меѓусебно поддржување во обезбедување на националната безбедност.


Соработката помеѓу Агенцијата за национална безбедност и Агенцијата за вработување има далекусежно влијание на квалитетот на националната безбедност, како и на интегритетот на вработувањето во државата. Меморандумот ќе обезбеди усогласеност помеѓу двете институции при спроведувањето на нивните соодветни надлежности, во согласност со националните и меѓународните стандарди за безбедност и заштита на податоци.